Rhyfeddodau'r Ardd

Heddiw pan es i lan i'r top i hôl ffa Ffrengig i ginio roedd na arogl hyfryd - blodau'r coed oren! Fel arfer mae nhw yn eu hanterth ym mis Mai, a dim ond y coed lemwn sy'n dangos blodau, ffrwythau bach a rhai aeddfed ar y pryd. Ond efallai bod yr orennau'n dysgu wrthyn nhw sut mae goroesi tywydd Asturias a defnyddio pob llygedyn o haul sy'n dod.
Rhyfeddod arall yw'r bwmpen Sisilaidd - y neidr. Mae'r planhigyn yma wedi dringo mewn i goeden cnau Ffrengig drws nesaf, a honno'n goeden weddol ifanc. Doeddwn i ddim yn hoffi ei gweld hi'n gwingo dan faich y squash anferth (dros metr o hyd), felly halais i'r gŵr i ddringo ar eu hôl nhw a thorri nhw lawr.
Dim lluniau eto - dwi ddim yn siŵr beth i wneud am hyn. Symud?

Fe Ddaeth yr Haul

Rwy'n gwybod bod y rhan fwyaf o'r darllenwyr yn canolbwyntio ar etholiad San Steffan heddiw, ond o'r diwedd rwyf i wedi cael diwrnod cyfan yn gweithio yn yr ardd. O gam-ddyfynnu hen gân:
'Hei, hei hei hei, fe ddaeth yr haul, fe ddaeth yr haul'.
Mae'r paneli haul wedi bod yn gweithio drwy'r prynhawn (roedd y cymylau'n rhy dew y bore ma), y gwair o flaen y tŷ wedi'i ladd a nifer o'r planhigion bach oedd yn cwato yn y tŷ gwydr wedi cael dod mâs. A'r cynnyrch!

3 kilo (chilo?) o orennau a'r un pwysau o ffa llydan sydd yma, newydd eu casglu. Y wahaniaeth yw, bron i hanner y cnwd orennau yw hynny, a dim ond rhyw 5% o'r ffa llydan. Bydd yn rhaid imi chwilio am ryseiti newydd i'w defnyddio nhw i gyd.